Изложба на плакати од руската Бородинска битка од 1812 во Радовиш

Во организација на Општинската Народна Библиотека “Браќа Миладиновци” од Радовиш, во нејзините простории се одржува изложба на плакати под мотото “Татковинска војна 1812”. На оваа изложба е претставена “Бородинската битка” од 1812 година и ќе трае околу две недели.

Според директорот на ОНБ “Браќа Миладиновци” од Радовиш, Станој Петров, кој е воедно и организатор, изложбата ја организира како мал знак на благодарност до рускиот народ и нивните претставници од дипломатскиот и приватниот сектор во Македонија, за нивната ангажираност и активност, како и за нивните донации во библиотеката, во кој меѓу позначајните спаѓаат опремувањето на мини читална и поправањето на други мали технички недостатоци во истата од страна на рудникот Бучим, обезбедениот литературен фонд на книги од страна на рускиот конзулат, како и санирањето на просторот и градењето на специјална рампа која овозможи полесен пристап за лицата со посебни потреби.

На свеченото отварање присуствуваа претставници од јавниот и приватниот сектор од општина Радовиш, како и претставници од невладините организации и многу граѓани. Почесен гостин на настанот беше конзулот на амбасадата на Руската Федерација во Република Македонија, Олег Дунаевски.Изложбата беше отворена од членовите на руското културно-уметничко друштво “Славјанка”, кои со својот настап ги воодушевија присутните гости.