Фото – Еве како ќе изгледа новата сала за Фолк фест Валандово

Фолк фест Валандово тридеценискиот јубилеј ќе го дочека во ново руво. Летната фестивалска сцена на која се родија голем број од македонските антологиски фолк бисери и од која голем број македонски фолк имиња го започнаа патот кон славата ќе добие комплетно нов лик. По повод јубилејот од триесет години постоење на првиот и најреномиран фестивал на македонската новосоздадена песна Фолк фест Валандово салата во која се одржува фестивалот целосно ќе се реконструира.

Идејното решение веќе е подготвено, а кон почетокот на летото ќе започне и реализацијата на проектот. Градоначалникот на општина Валандово Николче Чурлиновски вели дека со новиот проект е предвидено сегашната сцена која е полулетна да биде целосно затворена.

,, Новата фестивалска сцена ќе биде затворена комплетно, таванскиот дел ќе биде комплетно реконструиран, подиумот каде што настапуваат пејачите и воопшто музиката ќе биде реновиран. Тоа ќе биде основна база не само за одржување на Фолк фест Валандово, туку и за многуте други манифестации кои тука се одржуваат бидејќи Валандово е град на културата.,, вели Николче Чурлиновски – градоначалник на општина Валандово

Целиот проект ќе чини околу 20 милиони денари од кои најголемиот дел односно 15 милиони ги обезбедува министерството за култура, а останиот дел локалната самоуправа.

Реконструкцијата на салата треба да заврши до септември за кога е закажано и одржувањето на триесетото јубилејно издание на првиот и најреномиран фестивал на македонската новосоздадена песна. Реконструкцијата на салата е и причината поради која фестивалот само оваа година наместо во вообичаениот термин, крајот на месец мај ќе се одржи во септември.

Во меѓувреме општина Валандово го продолжи и конкурсот со кој се бараат нови песни кои треба да бидат изведени за време на јубилејното издание на фестивалот . Од оваа година повторно се враќа и стариот концепт на фестивалот со две полуфинални и една финална вечер. Новина има и во делот на наградите . Првата награда ќе биде 20 000 евра, втората 15 000 ,а третата награда е 10 000 евра.