Иселениците во Старо Коњарево, ем се веселеа, ем донираа средства за парно

Успешно заврши големиот хуманитарен концерт во Старо Коњарево кој беше реализиран на иницијатива на поранешни музичари од општина Ново Село кои подолго време се наоѓаат на привремена работа во странство . Во преполната сала на домот на културата во Старо Коњарево настапија повеќе познати музички имиња од регионот,  но и гости од соседните Бугарија и Србија.

Присутната публика имаше можност да ужива во богатиот репертоар составен како од традиционалните македонски старградски бисери, така и во големиот број стари но и нови светски хитови кои беа отсвирени комплетно во живо. Одличната свирка и внимателно избраниот репертоар беа доволна причина наместо планираните час и половина забавата да продолжи уште толку и на крајот да заврши својствено за нашиот народ со традиционално македонско оро.

Меѓу присутните во публиката беше и градоначалникот на општина Ново Село Петар Спасов кој ја поздрави иницијативата и изрази надеж дека истата ќе прерасне во традиција.

 Средствата кои беа собрани од донациите на иселениците, но и од влезниците ќе бидат донирани за изградба на системот за парно греење во училиштето во Старо Коњарево како и за социјално зарозените семејства од истото населено место.