300 кила колбаси и качамак на Странчинарските игри во Мокриево

Околу 150 килограми качамак и  исто толку домашни колбаси се изедоа на странчинарските игри во Мокриево. Манифестацијата која влече корени многу оддамна и оваа година привлече голем број посетители како од струмичкиот регион, така и од другите делови на државата.

Согласно традицијата игрите започнаа со меѓусебната борба на странчинарите за поделба на селото за просење, а потоа тргнаа по куќите на просење.  Древниот обичај налагал да ја посетат секоја куќа, а собраните  подароци и храна ќе ги поделат на сиромашните. Во денешно време сета храна што странчинарите ја собираат низ селото на крај се собира на едно место и од неа се подготвува голема гозба за сите учесници и присутни гости.

Мисијата на странчинарите е за време на некрстените денови да ги истераат сите лоши сили и зли духови и да се обезбеди бериќет и среќа во годината што доаѓа.

Странчинарските игри последните неколку години благодарение на заложбите на месната заеница добиваат  една организирана, карневалска форма. И оваа година исто како и во изминатите , пред платото на домот на културата во селото во карневалското  дефиле покрај групите од струмичкиот регион со свои маски се претставија  и гости од другите делови од Македонија, како и неколку маскирани групи од соседна Бугарија.

Игрите и оваа година се одржаа  под покровителство на градоначалникот Петар Спасов и општина Ново Село.