Писма на Славица Гаџова во Струмицa

Во галерискиот простор на Музејот на град Струмица Здружението за развој на културата и заштита на културното наследство Контекст – Струмица беше промовирана поетската збирка Писма на Славица Гаџова. Ова е втора активност на Контекст – Струмица од програмата Книжевност, преку која е предвидено секој месец да има по едно презентирање и промоција на автор од македонската книжевност. Овој програмски дел ќе биде обележан со еден спој меѓу концептуалното, перформативното, откривањето и основањето и освојувањето на нови простори како места на случување на книжевниот настан.

Промоцијата на Писма од Славица Гаџова беше комбинација меѓу “класичното” промовирање и концептуалното, што значи дека во рамките на промоцијата е предвидено и мини изложба на ракописи на Гаџова, нејзини автографи, кои таа во процесот на творење ги ставила на компјутер или хартија. Медијатор на промоцијата на Писма на Славица Гаџова беа Митко Гогов, промотор Ацо Гогов, додека интерпретација на нејзините песни, писма  интерпретираше Ангелина Тренчева Ангелова.