Иселениците од Босилово играа и пееа со Модус, Пицикато, Легато

Убавата македонска песна и богатиот фолклор ги собра иселениците од општина Босилово на едно место. На иницијатива на градоначалникот на Босилово Љупчо Колев во општинскиот центар се одржа третата по ред иселеничка средба.

- Босилово важи за општина која има голем број граѓани кои долги години живеат и работат во некоја од европските држави и токму затоа локалната самоуправа пред три години започна да ја реализира средбата која има за цел да ги собере на едно место иселениците од сите населени места од општината, но и од регионот и на симболичен начин да им покаже дека и покрај тоа што во моментов не живеат тука, општината сепак мисли на нив. Сметавме дека најубавиот начин да се направи тоа е концерт со убавата македонска песна која одсекогаш била алката која ги поврзува сите македонци со родниот крај без разлика каде живеат и работат, рече градоначалникот на Босилово Љупчо Колев.

Средбата се одржа на летната сцена на повеќенаменското спортско игралиште во училиштето Гоце Делчев во Босилово, а учесниците во програмата, Верица Русева и Пицикато, Благица Калева и група Модус, Катерина Ристова и групата Легато, КУД Гоце Делчев од Босилово и гостите КУД Слобода од Руменка од Србија, збратимената општина на Босилово направија забава која која долго ќе остане во сеќавањата на многубројната публика.

Програмата започна со најмладите од КУД Гоце Делчев и сплет од македонски песни и ора, а продолжи со гостите од КУД Слобода. Атмосферата својата кулуминација ја достигна кога на ред дојдоа Пицикато, Модус и Легато. Повеќе од илјада посетители скоро три часа уживаа во интерпретацијата како на добропознатите стари македонски песни, така и во големите хитови на Благица, Верица и Катерина.

На средбата присуствуваа и повеќе советници од советот на општина Босилово, градоначалниците на општините Василево и Ново Село, Ванчо Стојанов и Блажо Велков, претставници од Центарот за развој на Југоисточниот плански регион како и пратеникот во собранието на Република Македонија Ромео Тренов.