Василица во Мокриево се одбележа со Странчинарските игри

Селото Мокриево Василица ja одбележа со традиционалните странчинарски игри. Уште рано наутро странчинарите со тропањето на тешките ѕвонци ја разбудија Беласица и го најавија своето доаѓање во селото. Започнаа со меѓусебната борба за поделба на селските маала за просење, а потоа тргнаа по куќите. Обичајот налага да се посети секоја куќа, а собраните  подароци и храна да се поделат на сиромашните.

Легендата меѓу другото вели дека мисијата на странчинарите била за време на некрстените денови со тропањето на ѕвонци да ги истераат сите лоши сили и зли духови и да обезбедат среќа и бериќет за сите мештани за годината која доаѓа. Манифестацијата која влече корени многу оддамна и годинава привлече многу посетители од цела држава кои имаа можност да уживаат во настапите на голем број маскирани групи од повеќе краеви на Македонија, но и на гостите од соседна Бугарија.

Годинава најголемо внимание привлече ритуалот на пиење ракија од ѕвонците на странчинарите. Се верува дека децата кои имаат проблем со зборувањето доколку се напијат од таквата ракија ќе почнат да зборуваат без проблем.

И оваа година на манифестацијата се одржа под покровителство на општина Ново Село и градоначалникот Блажо Велков според кого истата значи можност за поголема афирмација на вековната традиција, но и можност за привлекување туристи.

Веќе вообичаено крајот на странчинарските игри го означи голема гозба за сите посетители за кои домакините обезбедија околу 100 килограми домашни колбаси и 150 килограми качамак.

Фото - ФБ профил на Општина Ново село