Делегацијата од Електростаљ на средба со в.д.градоначалникот Костадинов

Делегацијата од градот Електростаљ од Московската област на Руската федерација, која втор ден престојува во општина Струмица, денеска, оствари средба со вршителот на должноста градоначалник, Костадин Костадинов и неговите соработници. На средбата, домаќините и гостите разговараа за досегашната соработка и нудеа идеи и предлози за нејзино продлабочување и проширување во повеќе области. Посебен акцент беше ставен на туризмот и двете страни ги разгледуваа можностите за реализација на првите туристички чекори. Гостите, кои досега неколку пати престојуваа во општина Струмица го нагласија задоволството од нејзината туристичка понуда, а градоначалникот Костадинов, ја потенцираше подготвеноста на Општината и нејзините расположливи капацитети за прифаќање на туристите од Московската област. На средбата се разговараше и за поголемо активирање на економската соработка, бидејќи за неа и од двете страни има и голема желба и можности.
Во рамките на оваа посета, вечерва со почеток во 19,30 часот во летниот амфитеатар во градскиот парк, двете гостинки – вокални солистки од делегацијата на Електростаљ, ќе одржат концерт за граѓаните на Струмица.