Екипата на „Златна петорка“ бара повлекување на скандалозната одлука за неучество на филмот во трката за Оскар

За комесарите на чело со Тозија и Насков, не вреди учинокот на многубројната екипа која стои зад „Златна петорка“. Зошто само филмовите зад кои тие стојат, секогаш да бидат претплатени да учествуваат во трката за Оскарот, а на другите да им биде ускратено правото на тоа? Нивното вистинско лице се виде уште пред некоја година кога направија ист ваков скандал, а и лани, со фаворизираниот кандидат кој се знае каков успех имаше дома и надвор. Значи, целта им е: ако не сте наши (и ако сте барем малку подобри) не сте никој и не вредите ништо. Само вешто се затскриваат зад превезот на некакви небулозни критериуми и правилници. Си поигруваат со искуството и чувствата на сите личности вклучени во изработката на филмот. Тие се мајтапат со 17,000 гледачи во Македонија и со 80,000 во светот. Негираат дваесетина фестивали каде филмот е во официјална конкуренција. Анулираат 6 меѓународни награди. Тие се однесуваат со нашите културни вредности како да е тоа нивно дворско поле за поткусурување, а сакаат да располагаат со огромни државни пари како да ги наследиле од татко им. Удбашката цензурирачка историја како да ни се повторува... Што е многу, многу е! Конечно, да се престане со ваквите егзибиции и срамотења, оти се гледа дека системот за гласање и жирирање не им чини! Не сакаме да бидеме жртви на игрите на една мала група профитери. Конечно, да се стави крај на кулинарствата на инволвираните! Да ја поништат одлуката и јавно да ни се извинат за очигледните пропусти. Најпосле, да ги запреме да прават понатамошни такви дејанија, и јавно да ги осудиме, оти потоа веќе ќе биде доцна!!!