Премиерот Зоран Заев му го честиташе меѓународниот успех на режисерот Горан Тренчовски за филмот „Златна петорка“

Премиерот на Република Македонија, Зоран Заев, денеска во својот кабинет оствари средба со режисерот Горан Тренчовски и со продуцентот Дејан Милошевски.

Тренчовски го информираше премиерот за последните успеси на неговиот најнов филм „Златна петорка“ кој е добитник на првата награда на меѓународниот филмски фестивал во Мумбаи, Индија, и според нивните информации, очекуваат награда и од филмскиот фестивал во Њу Џерси во САД.

Освен овие признанија, овој македонски филм има освоено и 7 други меѓународни награди.

Премиерот Заев, ги поздрави успесите на авторската екипа на овој филм, и истакна дека нивните успеси се значаен придонес во промовирање на македонската култура преку својата уметност.

- Делата на културата треба да ги гледаме како наши деца, кои остануваат да живеат и после нас со векови – рече премиерот Заев во оваа прилика.

Претседателот на Владата на Република Македонија, во оваа прилика, истакна дека владата прави сѐ културните квалитети и капацитети со кои располага Македонија да бидат поддржани и афирмирани.