Протест во Старо Коњарево против сеча на шумата над селото

Жителите на Старо Коњарево со протестен собир побараа да престане сечата на шумата над нивното село на планината Беласица. Според нив тоа е причина за загадување на водите кои доаѓаат од планината, но и стравуваат од уште една катастрофална поплава како таа од 2004 година, кога селото беше затрупано со камења од планината Беласица.

Според жителите, земјиштето во близина на изворите во местото Топлик е нестабилно, што се гледа од соголените површини од кои земјата се лизнала и со било какви градежни работи уште повеќе се пореметува статиката на земјиштето што доведува до потполно загрозување на снабдувањето на селото со вода.Покрај тоа, тие се спротивставуваат и на пробивање на нов пат за експлоатација на шумата и бараат од надлежните да не се гради.

На протестот присуствуваше и градоначалникот на Ново Село, Никола Андонов кој рече дека бараат од надлежните иституции да дојдат стручни лица и да видат дали е оправдано да се вршат такви активности над селото Старо Коњарево.